Drim ngai 11/04, Thủ tướng Cíñ phủ ồng Phạm Minh Chính neh lòt sền nisơna broă lơh jat Nghị quyết sồ 30 bơh Cíñ phủ dê bè blơi phan bơna sơnơm tơm ba gah lơh sơnơm mờ Nghị địñ sồ 07 bơh Cíñ phủ dê bè atbồ phan bơna măy mok sơnơm tơm ba gah lơh sơnơm tàm Hìu sơnơm Bạch Mai, Hìu sơnơm kơnòm dềt Dà lơgar mờ Anih Đông Anh, Hìu sơnơm kòp Nhiệt đới Dà lơgar tàm Hà Nội.

Thủ tướng đơs nền, Đảng, Dà lơgar sền gròi ngan tus pràn kơl dang să jan bơh làng bol dê, tơnơ̆ tŭ geh bơta ờ tơl sơnơm neh geh jơnau sồr lơh bơsong di tŭ; pơn jờng ală cau kòp iang nùs sơm kòp mờ mhar bời kòp. Gơwèt mờ jơnau đơs bè anih ơm, anih bĭc ai hìu bơnhă cau kòp in, Thủ tướng đơs là dà lơgar gam tàm bơta bơtàu tơnguh, phan bơna bơh ală hìu sơnơm dê ờ hềt di pal mờ jơnau kờñ jat bè bơta kơ̆p kờñ, pal bơsong hời rơ hời, ngan là tàm Hìu sơnơm kơnòm dềt Dà lơgar, ờ hềt tơl ală bơta nàng tam cah is cau kòp mờ hìu bơnhă cau kòp; sồr Hìu sơnơm mờ hìu bơnhă cau kòp pơgồp bal, lơh geh bơta niam ngan rlau jơh nàng sền gròi bal ai cau kòp in, pleh bơta lơngeh lơngañ.