Rơndăp broă lơh bơnah gơl Cần Thơ- Hậu Giang mờ Rơndăp broă lơh bơnah gơl Hậu Giang- Cà Mau gơ wèt Rơndăp broă lơh bơ̆t bơtàu broă lơh gùng rơndeh lòt mhar đah Tô- đah Jum đah măt tơngai Lik tơngai bơh nam 2021- 2025, mờ kờp jơh khà priă bơcri là rlau 10 rbô 370 tơmàn đong.

Tàm tiah lơh gùng, Thủ tướng ồng Phạm Minh Chính neh pà phan pơndờm pơnđiang ală mpồl lơh gùng, mơkung sồr gơnoar ătbồ tiah do pal hòi tơrgùm jơh ală anih lơh broă cíñ trị, làng bol mŭt bal, bal mờ gơ̆p lơh gơlik geh srơh tàm pơrlòng tàm tiah lơh broă. Mờ Thủ tướng kung sồr mpồl lơh gùng ngui bơta jak chài măy mŏk dê bal mờ jơh ală broă lơh bơta chài uă ngan rlau jơh nàng lơh mhar tŭ tơngai lơh gùng, mơya pal lơh geh bơta kơnhăp, lơngăp lơngai, niam mơkung dră wơl sa kwề sa kwà, bơta ờ niam, pơhì pơhà. Gơ wèt mờ làng bol tàm tiah rơndăp broă lơh, Thủ tướng sồr kâp ủy, gơnoar ătbồ tiah hơ̆ pal sền gròi, pal gàr làng bol in tus tiah ơm pa geh rài kis niam rlau mờ tiah ơm yau, ai tơl broă lơh broă sa làng bol in, bơh hơ̆ gen hơ̆ sồng lơh geh cồng nha tơrgùm bal bơh gùng rơndeh lòt mhar dê.