Ủy ƀan Thường vụ Quôk hội neh geh jơnau yal ngan ngồn bè broă lơh lùp mờ hơ jơnau lùp bơh dơ̆ pơrjum do dê. Jăt mờ hơ̆, ală mpồl broă geh Quôk hội sac rwah lùp là bơ̆t bơtàu, nội vụ, yal tơngĭt mờ mblàng yal jơnau, lùp sền.

Mpồl broă dơ̆ sơnrờp gơwèt gah broă bơ̆t bơtàu, Ƀộ trưởng Ƀộ Xây zựng ồng Nguyễn Thanh Nghị hơ jơnau lùp gơrềng tus bơta geh ngan, gùng dà broă lơh tơnguh uă bơta niam rơndăp ù tiah mờ ătbồ bơtàu tơnguh tiah drà Việt Nam, ngan là tàm ală ƀòn dờng dờng. Mpồl broă dơ̆ bàr gơwèt gah broă lơh yal tơngĭt mờ mblàng yal jơnau, Ƀộ trưởng Ƀộ Thông tin mờ Truyền thông ồng Nguyễn Mạnh Hùng geh hơ jơnau lùp gơrềng tus broă ngui măy mok yal tơngĭt jơnau tàm ătbồ dà lơgar, bơ̆t bơtàu Cíñ phủ sồ, gơnoar ătbồ sồ. Mpồl broă dơ̆ pe gơwèt gah broă lơh nội vụ, Bộ trưởng Ƀộ Nội vụ mò Phạm Thị Thanh Trà geh hơ jơnau lùp bè broă rơndăp tăp sèng rơndăp mpồl cau lơh broă, tơrmù cau lơh broă sa priă nhai dà lơgar, bơ̆t bơtàu ală gơnoar broă, broă lơh gơ jăt bal mờ rơndăp tăp wơl mpồl kwang bàng, kông cưk, viên cưk mờ broă lam lơh jăt lơh tam gơl wơl broă lơh priă nhai gơwèt mờ kwang bàng, kông cưk, viên cưk. Mpồl broă dơ̆ puan gơwèt mờ gah broă lơh lùp sền, Kwang ătbồ dờng Gah lùp sền Cíñ phủ dê là ồng Đoàn Hồng Phong hơ tơn jơnau lùp bè tơnguh uă bơta gơtùi lơh jăt mờ geh cồng nha tàm broă lơh lùp sền, di tŭ rơcăng sơndră mờ kơryan lài broă lơh tìs adat boh lam. Lồi dơ̆ lùp mờ hơ jơnau lùp, Thủ tướng Cíñ phủ ồng Phạm Minh Chính geh lơh loh ală broă geh gơrềng mờ hơ jơnau lùp bơh kwang bàng Quôk hội dê.