Mho ngai 03/4, Pơrjum pờ tơlik tơn tàm internet đah Cíñ phủ mờ ală càr, ƀòn dờng cribơyai bè Jơnau yal sền sơ wì bơ tơl cồng nha lam lơh broă rơndap lơh bơcri priă dà lơgar nam 2022, broă lam lơh broă rơndap lơh bơcri priă dà lơgar nam 2023; Jơnau yal sền sơ wì bơ tơl cồng nha lam lơh broă rơndap lơh bơtàu tơnguh lơh sa - mpồl bơtiàn nam 2022, broă lam lơh jat broă rơndap lơh bơtàu tơnguh lơh sa- mpồl bơtiàn nam 2023; Jơnau yal sền sơ wì bơ tơl cồng nha lam lơh kes priă dà lơgar nam 2022, broă lam lơh kờp dŭ lài tă dơ̆ ngui kes priă dà lơgar nam 2023.

Tàm pơrjum, ală kwang bàng neh ring bal mờ ală Jơnau yal nàng yal Quôk hội sền sơ wì. Bulah bè hơ̆, pal bơ tơl, lơh loh 2, 3 tơngume, ngan là mblàng lơh loh ală bơta gơlik geh tàm dunia gơ rềng tus Việt Nam, ală kal ke, bơta ờ niam tàm dơlam rài lơh sa dê; ală kòl yan pal tă bơsong nàng sơlơ tơnguh bơcri priă dà lơgar, lam lơh kes priă dà lơgar mờ bơtàu tơnguh lơh sa- mpồl bơtiàn. Đơs pơn dut dơ̆ pơrjum ƀùi mho, Thủ tướng Cíñ phủ ồng Phạm Minh Chính đơs loh, ờ hềt tam gơl jơnau kờñ gơguh lơh sa nam 2023 mờ broă jàu gròi sền bơta roh giă priă. Bulah bè hơ̆, ală ƀộ, gah broă lơh dà lơgar pal pơn đơl pràn uă rlau tai nàng lơh geh jơnau kờñ, mờ kung geh bơta jat sền, git loh broă gơlik geh, geh jơnau rơcang lài, broă lơh di tŭ.