VOV4.K’ho- Mho ngai 23/01, tàm càr Vĩnh Long, Thủ tướng Cíñ phủ ồng Phạm Minh Chính mờ Duh broă sùm Ƀan Ƀí thư ồng Võ Văn Thưởng neh tus chu ñàng, pơdơng bơkàu tàm tiah lời kir sơnrai Củ tịc Mpồl duh broă Ƀộ trưởng Phạm Hùng mờ tiah lời kir sơnrai Thủ tướng Cíñ phủ ồng Võ Văn Kiệt.

Thủ tướng Phạm Minh Chính bal mờ mpồl lơh broă neh kun bồ jơh nùs ki ngàm ngan pơdơng bơkàu, chu ñàng, lời dùl êt phuk kun bồ nàng kah kơlôi wơl dà kơlhề bơh Củ tịc Mpồl duh broă Ƀộ trưởng ồng Phạm Hùng mờ Thủ tướng Cíñ phủ ồng Võ Văn Kiệt, là bàr nă cau kòn jak chài ngan bơh ƀòn lơgar càr Vĩnh Long dê neh geh uă tă pơgồp dà kơlhề, phi sa ai broă lơh tam dră mờ bol sò tơm dong klàs jơi bơtiàn, bơ̆t bơtàu mờ sền gàr dà lơgar. Di tàm dơ̆ do, Thủ tướng bal mờ mpồl lơh broă neh lòt còp mờ nting bơr gờm chờ sa tềp kông ñân bơh tiah lơh sa mờ măy mok Hoà Phú, kơnhoàl Long Hồ, càr Vĩnh Long in; nting bơr sa tềp, pà phan pà ai ală hìu bơnhă cíñ sac, hìu rƀah, ală hìu bơnhă gơtìp gơrềng kơn jơ̆ tài bơh kòp dơng Kovid-19 in mờ jàu 100 nơm hìu pà ală hìu bơnhă kal ke in bơh kơnhoàl Vũng Liêm mờ Tam Bình dê.

Cau mblàng Lơ Mu K’Yến