VOV4.K’ho - Mho òr (26/01), Thủ tướng ồng Phạm Minh Chính còp, chờ gờm satềp kwang bàng, cau ling tàm pôs ling sền gàr mpồng nhàr dà lơgar dunia Móng Cái. Ala măt Kwang đơng lam Đảng, Dà lơgar, Thủ tướng Cíñ phủ ồng Phạm Minh Chính pơyia tus ală kwang bàng, cau ling tàm pôs ling mpồng nhàr dà lơgar Móng Cái, ală mpồl lơh broă ală gah lơh broă tàm mpồng nhàr dà lơgar jơnau còp să mờ jơnau chờ gờm niam bơnĕ ngan.

Thủ tướng đơs tờm, Quảng Ninh là càr geh ù tiah kwơ màng bè bơta lơngăp lơngai dà lơgar, là mpồng lơh broă bal dunia dờng dà lơgar dê. Den tàng, mpồl ling sền gàr tiah nhàr dà lơgar geh kơnòl kwơ màng, pơgồp bal tàm broă sền gàr gơnoar tờm ù tiah dà lơgar, ai geh bơta ƀuơn broă tơnguh bơtàu lơh sa mpồl bơtiàn. Bè kơnòl tờm tàm nam 2022, Thủ tướng sồr, mpồl ling sền gàr tiah nhàr dà lơgar pal git loh jơnau kờn uă ngan là sền gàr kơl jăp gơnoar tờm ù tiah, geh tơl ù tiah dà lơgar mờ gùng nhàr dà lơgar; gàr kơl jăp bơta ring lơngai, ring niam tàm tiah nhàr dà lơgar nàng chồl pràn broă tìp bal, git gơ̆p lơh bơyô bal, mờ tơnguh bơtàu; bañ lời gơrềng tus mờ broă lơh bal tàm bơta ring niam, git gơ̆p, lơh broă bal mờ lơgar rềp bal. Lơh jăt niam broă lơh bal mờ lơgar ndai broă sền gàr tiah nhàr dà lơgar; pơgồp bal tàm broă bơ̆t bơtàu tiah nhàr dà lơgar ring lơngai, git gơ̆p, lơh broă bal mờ tơnguh bơtàu.

Cau mblàng Ndong Brawl