Drim òr (20/08), Thủ tướng ồng Phạm Minh Chính neh lơh broă mờ Ƀan Lơh kơnòl broă sùm Tỉñ ủy càr Kon Tum bè broă bơtàu tơnguh lơh sa mpồl bơtiàn mờ bơsong ală jơnau đơs, jơnau dan nàng càr Kon Tum bơtàu tơnguh mhar, kơl jăp. Tơnơ̆ mờ tŭ iăt jơnau đơs bơh kwang đơng lam ală ƀộ, gah lơh broă, Thủ tướng Cíñ phủ ồng Phạm Minh Chính jờng rơ broă lơh ngan mờ đơs niam cồng nha neh lơh geh bơh Đảng ƀộ, gơnoar atbồ, ling klàng mờ làng bol càr Kon Tum dê, pơgồp bal tàm cồng nha bal bơh gùt lơgar dê. Thủ tướng neh đơs loh ală cồng nha neh lơh geh bơh càr Kon Tum dê bal mờ ală broă lơh ngan ờ pràn, pal geh tơmù. Tàm tơngai tus, Thủ tướng hòi jà, Càr pal lơh geh cồng nha Nghị quyết Pơrjum dờng dơ̆ XIII bơh Đảng Dà lơgar, Nghị quyết sồ 23 bơh Ƀộ Cíñ trị mờ Nghị quyết Pơrjum dờng Đảng ƀộ càr; tàm hơ̆ pal lơh jăt nền nòn 05 kơrnoăt bơyai lơh mờ lơh broă bơh Đảng dê.

Tơnguh nùs nhơm tam klăc bal, lơh is, pràn is, brồ guh mờ bơta pràn geh is; bañ kơ̆p gơn, kơnờm uă ir, tam gơl pa sùm, ngui geh cồng nha bơta geh krơi is , bơta pràn tàm pơn drờm, bơta niam geh pơnrơ, hòi jà mờ ngui geh cồng nha ală bơta pràn nàng bơtàu tơnguh. Bal mờ hơ̆, Thủ tướng sồr càr pal tơrgùm tơnguh bơtàu lơh sa tơlir, lơh sa sồ, lơh sa gơlòt bal. Lơh pràn broă pơgồp bal tiah nàng ai geh bơta niam bơtàu tơnguh ring bal. Lơh geh bơta niam bơtàu tơnguh lơh sa càr dê mờ ală càr tàm tiah jăt gah dà lềng tàm gùl lơgar jăt broă lơh jăt gah gùng lòt 14, 24 mờ tiah nhàr dà lơgar đah lơgar Việt Nam – Lào – Campchia.

Lài hơ̆, tàm broă lơh lơh broă tàm càr Kon Tum, Thủ tướng Cíñ phủ ồng Phạm Minh Chính bal mờ mpồl lơh broă neh lòt sền bàr pe anih lơh broă, rơndăp broă lơh lơh sa- mpồl bơtiàn tàm càr Kon Tum. Thủ tướng Cíñ phủ ồng Phạm Minh Chính mờ mpồl lơh broă neh lòt sền rơndăp ù tiah lơh uă đèng càl tàm ù tiah càr Kon Tum tàm ù tiah xã Tân Lập, kơnhoàl Kon Rẫy. Thủ tướng sồr ală Bộ, ngàñ, anih lơh broă mờ càr Kon Tum pơn jăt tai kờp sền, kơlôi sơnơng, đơs bơta ƀuơn bơta pràn; rơndăp broă lơh bơcri priă lơh uă đèng càl geh cồng nha; di pal mờ rơndăp ù tiah bal bơh jơh gùt ù tiah mờ jơh gùt dà lơgar; gàr niam broă yal tơngĭt loh làng, song dơ pă, di mờ jơnau sồr lơh jăt niam cồng nha bơh priă bơcri lơh dê, ngui jơh bơta ƀuơn, bơta pràn lơh uă ală rơndăp broă lơh năng lượng lơh gơlik wơl tàm ù tiah càr Kon Tum dê.

Thủ tướng lòt sền tiah rơndăp ù tiah ƀlàng rơndeh par Măng Đen; ù tiah kờp dŭ geh lơh gùng rơndeh lòt mhar Kon Tum mờ Quảng Ngãi; Gùng rơndeh dờng 24 tàm tơrbŏ bal mờ càr Kon Tum bal mờ càr Quảng Ngãi; tiah kờp dŭ gơ hòi gơ jà lơh rơndăp broă lơh Tiah drà, mpồl broă drơng  ala, lòt nhơl gơ wèt tiah tiah Jum mat tơngai lik tàm kơnhoàl Kon Plông, càr Kon Tum dê. Tơnơ̆ tŭ lòt sền ù tiah, iăt, kơno jơnau yal yal bè broă bơtàu tơnguh tiah lòt nhơl Dà lơgar Măng Đen mờ ală broă lơh bơt bơtàu gùng lòt tàm tơrbŏ bal, Thủ tướng Cíñ phủ ồng Phạm Minh Chính pà gĭt, broă bơtàu tơnguh Tiah lòt nhơl dà lơgar Măng Đen di pal mờ gùng dà pơlam bơtàu tơnguh tơlir, kơ̆ kơl jăp, làm uă ală bơta bơh càr Kon Tum dê; sồr càr Kon Tum pơgồp bal mờ ală Bộ, ngàñ, anih lơh broă lơh jăt broă lơh rơndăp ù tiah nàng lơh jăt niam bơta ƀuơn, bơta pràn, tŭ tơngai niam uă, bơta pràn tàm pơrlòng mờ bơsong geh ală bơta ờ hềt di pal bơh Măng Đen dê; ngan là ờ gŏ di lơh roh tĕ ală bơta tŭ do, lơh tam gơl bơhiàn niam chài niam bơnĕ is bơh Măng Đen dê.

Mho mờ mang ngai 19 nhai 08, còp Ƀòn Niam chài lòt nhơl mpồl bơtiàn Kon Pring tàm thị trấn Măng Đen, Thủ tướng ồng Phạm Minh Chính đơs tờm, tam klăc là broă geh kwơ jŏ jòng, là dùl bơta tờm ai geh jai pha bơh kắc màng lơgar Việt Nam dê; mờ là dùl bơhiàn kwơ màng ngan bơh jơi bơtiàn he dê, den tàng, làng bol pa sền gàr, prăp gàr mờ tơnguh. Thủ tướng sồr làng bol ală kòn cau tam klăc bal, dong kờl bal lơh pràn bơtàu tơnguh lơh sa mpồl bơtiàn; lơh jăt gùng dà broă lơh bơh Đảng, adăt boh lam bơh Dà lơgar dê; sền gàr bơta lơngăp lơngai, bañ dờn cau ờ niam bơchồt, sền gàr bơta niam chài kòn cau... di tàm dơ̆ rơcang mŭt nam bơsram pa 2023-2024, còp Hìu bơsram mầm nòn Măng Đen tàm thị trấn Măng Đen, kơnhoàl Kon Plông, Thủ tướng ồng Phạm Minh Chính sồr ală cau pơgru pal git tam gơl pa gùng dà broă bơto bơsram, sồr hìu bơsram pal rơcang niam ală jơdŭ bơsram. Di tàm dơ̆ do, Thủ tướng Cíñ phủ jào pà 1 tơmàn đong nàng hìu bơsram lơh niam wơl ală phan bơna, blơi tơl phan bơsram, phan nhơl ai kơnòm dềt in.