VOV4.K’ho- Mho ngai 01/07, tàm dơ̆ lòt lơh broă tàm càr Dăk Lăk, Thủ tướng Cíñ phủ ồng Phạm Minh Chính neh lòt còp, lơh broă, pơndờm pơnđiang kwang bàng, cau ling Gah đơng lam Mpồl ling klàng càr Dăk Lăk mờ Kwang àng càr Dăk Lăk. Đơs tàm dơ̆ lơh broă, Thủ tướng sồr Gah đơng lam Mpồl ling klàng càr Dăk Lăk pa bơsram mờ lơh jăt niam bơta pal jăt Đảng đơng lam bồ jơh, đơng lam bồ tơn mờ tơl làm bè ală bơta gơwèt mờ Mpồl ling klàng làng bol, lơh jăt bơta ătbồ bơh Dà lơgar dê, gàr bơta gĭt gơ̆p rềp mềl mờ làng bol.

Bal mờ hơ̆, pal gĭt nền broă gơlik geh nàng tă pơgồp jơnau đơs ai kâp ủy Đảng, gơnoar ătbồ in, bañ lời gơtìp rơmơ̆p ndơl, nisơna mờ ală jơnau digơlan gơlik geh; sùm rơcăng lài tam lơh tàm bơta jơnhoa ngan rlau jơh, sền gàr kơ̆ kơl jăp bơta lơngăp lơngai is, gơnoar tờm ù tiah mờ tơl làm ù tiah dà lơgar, bơta kwơ dà lơgar, jơi bơtiàn, rơcăng lòt tus khăt tàm tiah lơi, lơh sir jơh khăt kơnòl broă lơi mờ Đảng mờ Dà lơgar jàu kơnòl. Thủ tướng sồr kâp ủy, gơnoar ătbồ ală kâp pơn jăt tai sền gròi, ai tơl bơta ai mpồl ling klàng làng bol, mpồl kwang àng làng bol ală kâp in lơh jăt niam kơnòl broă geh jàu.

Cau mblàng Lơ Mu K’Yến