VOV4.K’ho - Kung tàm drim òr (28/04), Thủ tướng ồng Phạm Minh Chính tus còp, pơn dờm pơn điang kơnòm bơsram geh rài kis gơtìp kal ke tàm hìu bơsram kấp 3 Zân tộk nội trú Huỳnh Cương, càr Sóc Trăng.

                                    Thủ tướng ồng Phạm Minh Chính còp ơdŭ bơsram

Cri bơyai mờ kwang đơng lam càr Sóc Trăng mờ kwang đơng lam hìu bơsram, Thủ tướng pơn jờng nùs nhơm bơsram sră, bơto bơtê bơh ală cau pơgru, ală kơnòm bơsram neh lơh ngan sơrlèt mờ kal ke, lơh ngan pah ngai nàng bơto niam mờ bơsram niam. Đơs wơl jơnau đơs bơh Bác Hồ dê “Tài bơta kwơ 10 nam tam chi, tài bơta kwơ 100 nam bơto kòn bơnus”, Thủ tướng kơ̆p kờñ ală cau pơgru bal mờ kơnòm bơsram tàm hìu bơsram Huỳnh Cương geh tơnguh bơhiàn ờs mờng jăk chài, tơnguh bơtàu tơl ală bơta, geh uă cồng nha niam rơlao tai tàm broă bơto mờ bơsram sră. Thủ tướng kơ̆p kờñ mờ pin dờn, mờ broă sền gròi bơh kwang đơng lam ală kấp, broă pin dờn mờ kơ̆p kờñ bơh cau mè bèp, nùs nhơm niam bơh ală cau pơgru dê, jơnau kơ̆p kờñ bơh cau kơnòm să, ală kơnòm bơsram geh lơh ngan bơsram sră, bơsram tàp nùs nhơm niam nàng tam gơl rài kis bơh să tờm, pơgồp bal tàm broă bơ̆t bơtàu ƀòn lơgar, dà lơgar ngai sơlơ pas gơs.

Cau mblàng Ndong Brawl