Mho òr (13/12), tơnơ̆ mờ dơ̆ wă geh bơyai lơh tàm Gơlang Egmont, bàr Thủ tướng neh bơyai lơh dơ̆ cri bơyai bal. Tàm dơ̆ cri bơyai, Bàr kwang đơng lam neh ring bal ală gùng dà, broă lơh dờng nàng lơh pràn tơl ală bơta lơh broă bal đah bàr lơgar, tàm hơ̆ uă ngan là lơh nền nòn lơh broă bal tàm broă lơh jŏ jòng bè lơh sa suơn sre, lơh pràn lơh broă bal bơcri priă, kă bro mờ tàm ală gah broă geh bơta niam ndai.

Bàr gah ring bal pờ ơnàng lơh broă bal đah bàr lơgar tàm ală gah broă sền gàr bơta lơngăp lơngai dà lơgar, bơto bơtê mờ bơsram, bơta chài rơgơi, tàm hơ̆ uă ngan là broă bơyai lơh Ngai chài rơgơi tàm tơl lơgar nàng lơh gơguh tai jơnau git wă, tìp bal làng bol, nhơl chờ mờ lơh pràn broă pơgồp bal nàng bơsong ală bơta lòng gùt plai ù. Thủ tướng Cíñ phủ ồng Phạm Minh Chính hòi jà Cíñ phủ lơgar Bỉ pơn jăt tai sền gròi, ai tơl bơta ƀuơn mpồl cau lơgar Việt Nam kis tàm lơgar Bỉ tơrgùm bal geh cồng nha mờ tă pơgồp bal tàm broă tơnguh bơtàu lơh sa mpồl bơtiàn lơgar Bỉ dê, sền do là bơta tàm tơrbŏ bal, lơh pràn bơta git gơ̆p, lơh broă bal đah bàr lơgar dê.