Cri bơyai ală broă tơnguh bơta git gơ̆p, tam klăc lơh broă bal jŏ jòng đah lơgar Việt Nam mờ lơgar Tây, tàm hơ̆ uă ngan là tàm gah lơh broă bal lơh sa, kă bro, bơcri priă, wèt tus tơnkah 50 nam crơng gơs broă lơh bal mờ lơgar ndai đah lơgar Việt Nam mờ lơgar Tây mờ 10 nam tam klăc lơh broă bal jŏ jòng tàm nam 2023.

Bơh broă cri bơyai tàm điện thoại, bàr Thủ tướng đơs tờm, lơh broă bal lơh sa geh gơnoar broă tờm tàm bơta git gơ̆p, tam klăc lơh broă bal jŏ jòng đah lơgar Việt Nam mờ lơgar Tây; tam pà bal mờ cri bơyai bè broă lơh jăt ală rơndăp broă lơh broă bal lơh sa tờm tàm broă git gơ̆p đah bàr lơgar, tàm hơ̆ uă ngan là rơndăp broă lơh gơl gùng rơndeh ồs tàm ƀòn drà bơh Nhổn tus anih rơndeh ồs ơm Hà Nội, gờñ ai gơl gùng lơh ñhoa hờ đang nàng ngui kă bro lài mờ lồi nam do. Thủ tướng lơgar Tây mò Elisabeth Borne tơlik nùs nhơm kơ̆p kờñ tơnguh lơh broă bal mờ lơgar Việt Nam tàm ală gah lơh sa sồ, tam gơl sồ, phan bơna mờ kwơ màng là năng lượng geh lơh wơl; ring bal lơh pràn lơh tơl, lơh geh cồng nha nàng ngui ală bơta niam bơnĕ dờng màng bơh Hiệp định kă bro khăt gơboh đah lơgar Việt Nam mờ mpồl tam klăc câu Âu (EU) (EVFTA). Thủ tướng Cíñ phủ ồng Phạm Minh Chính hòi jà lơgar Tây ai tơl bơta niam nàng ală phan geh lơh bơh broă lơh sa suơn sre jăt kàl lơgar Việt Nam geh tăc tàm drà kă bro lơgar Tây; mờ hòi jà lơgar Tây gờñ lơh gơs broă kĭ Hiệp định sền gàr dong kờl bơcri priă mpồl tam klăc câu Âu mờ lơgar Việt Nam (EVIPA) nàng ai geh bơta pràn tơnguh bơta git gơ̆p bơcri priă đah bàr lơgar mờ sồr Ủy ƀan câu Âu (EC) gờñ sơbì “sră rơmĭt” gơwèt mờ phan tàm dà lơgar Việt Nam.