Tàm dơ̆ cribơyai tàm điện thoại, Thủ tướng Cíñ phủ ồng Phạm Minh Chính đơs nền gùng dà broă lơh ờ tŭ lơi tam gơl bơh lơgar Việt Nam dê sùm sền dờng màng bơtàu tơnguh bơta gĭt gơ̆p lơh broă bal tơl làm mờ lơgar Hà Lan. Bàr gah ring bal pơgồp bal niam sơlơ tơnguh tai dơ̆ lòt còp lơgar Việt Nam kấp Dà lơgar bơh Bơtau mờ pơ ùr Bơtau lơgar Hàn Lan dê tàm tơngai tus; pơn jat tai ngui ală tŭ tơngai niam bơh Hiệp địñ kă bro phan khat gơboh đah Việt Nam mờ EU (EVFTA), pơnđơl pràn lơh ngan ai priă lơh geh bơh kă bro phan đah 2 gah dê lơh geh 15 tơmàn dolar Mỹ tàm tơngai tus.

Bàr gah kung neh cribơyai bè bàr pe broă ală lơgar mờ tàm tiah do dê sền gròi bal. Bè broă dà lềng tiah đah mat tơngai lik, 2 nă Thủ tướng đơs sùm bơta kwơ màng bơh broă gàr niam lơngăp lơngai, bơta lơngăp lơngai, khat gơboh gùng dà lềng mờ bơsong ring lơngai ală dơ̆ tam pìt tam pà jat tàm adat boh lam ală lơgar, ngan là UNCLOS nam 1982.