Tơnơ̆ tŭ iăt ală jơnau đơs, Thủ tướng ồng Phạm Minh Chính jờng rơ uă ngan jơnau đơs jơh nùs jơh tồr, geh kơnòl, di mờ bơta geh ngan, jrô ơnàng lam uă, geh cồng nha bơh ală Phó Thủ tướng mờ ală cau ala mat tus bal pơrjum dê. Is ồn, là jờng rơ nùs nhơm iăt kơno, khin cha kơlôi khin cha lơh, khin cha đơs bơh ală mpồl lơh sa kă bro bơt bơtàu dê tus bal tàm pơrjum, neh đơs ală broă gơ cèng bơta bơtàu tơnguh mhar, bồ tơngoh kơlôi sơnơng tam gơl pa bơceh lơh tus bal bơsong ală bơta kal ke dờng bơh Dà lơgar dê.

Thủ tướng jàu Cơldŭ lơh broă Cíñ phủ in đơng lam, pơgồp bal mờ Ƀộ bơt bơtàu mờ ală ƀộ, gah broă geh gơrềng iăt, kơno tơl làm ală jơnau đơs tă pơgồp, ai lơh jat Jơnau đơs pơndŭt Pơrjum dê nàng ring bal sồr lơh, lam lơh jat. Tàm tơngai tus, Thủ tướng sồr, kwang đơng lam bồ ală Ƀộ, gah broă, ală tiah, ală mpồl lơh sa kă bro bơt bơtàu sùm sền gĭt loh broă lam lơh ală rơndăp broă lơh tờm, ală rơndăp broă lơh tờm Dà lơgar dê geh cồng nha, lơh di tŭ tơngai, jơnau kờñ geh ai là bơta gơn kơnờm kwơ màng ngan nàng lơh jat broă lơh lơh sa mờ măi mok, măi mok lơh jơh lơm.