VOV4.K’ho - Drim òr (26/07), tàm hìu lơh broă Cíñ phủ, Thủ tướng ồng Phạm Minh Cíñ đơng lam dơ̆ pơrjum Cíñ phủ jăt tơngu me bè bơ̆t bơtàu adăt boh lam nhai 7 nam 2022 nàng sền wơl 4 rơndăp broă cih adăt boh lam, 1 jơnau sồr bơ̆t bơtàu adăt boh lam mờ 1 nghị quyết bơh Cíñ phủ.

Đơs tàm dơ̆ sơn đờm pơrjum, Thủ tướng ồng Phạm Minh Chính đơs loh, broă lơh gơs kơrnoăt là 1 tàm 3 broă lơh pràn jŏ jòng. Thủ tướng sồr sền wơl bơh tàm bơta mùl màl nàng tus bal bơtơl, lơh gơs, drơng broă atbồ, đơng lam niam rơlao. Ală ƀộ, gah lơh broă, ală càr, ƀòn dờng tơnguh bơta pràn ai broă lơh do in tài kung gam uă tiah ờ hềt mùl màl sền gròi. Thủ tướng jào Ƀộ Tư pháp geh jơnau bơto sồr tơnguh bơta pràn ai broă bơ̆t bơtàu sră nggal adăt boh lam; Ƀộ Tài cíñ pal sền gròi tus mờ broă lơh do. Pơrjum do tơrgùm sền wơl 4 rơndăp broă cih adăt boh lam, tàm hơ̆ geh Adăt rơcang sơndră làng bol lơh, adăt rơcang sơndră, tam dră mờ broă lơh priă ờ ngan gơs priă ngan (tam gơl), adăt sền gàr gơnoar kwơ cau ngui sa (tam gơl), adăt lơh broă điện tử, là ală adăt geh kwơ ngan tàm bơta tŭ do nàng lơh jăt broă atbồ dà lơgar nền nòn, geh cồng nha rơlao, ai tơl bơta niam nàng làng bol lơh jăt adăt boh lam niam rơlao.

Cau mblàng Ndong Brawl