Drim òr (21/04), tàm gơlang Củ tịc, Thủ tướng Cíñ phủ ồng Phạm Minh Chính đơng lam Dơ̆ wă Thủ tướng lơgar Séc ồng Petr Fiala mờ Mpồl kwang bàng kấp dờng lơgar Séc còp mùl màl lơgar Việt Nam bơh ngai 20 tus ngai 22 nhai 04. Dơ̆ wă geh bơyai lơh jăt broă lơh ai kwang đơng lam Cíñ phủ in tus còp mùl màl lơgar Việt Nam.

Thủ tướng ồng Phạm Minh Chính jà Thủ tướng lơgar Séc ồng Petr Fiala lòt sền Mpồl pơnyờ să ling klàng làng bol lơgar Việt Nam dê, tơnơ̆ mờ hơ̆ bàr Thủ tướng yal ală kwang bàng tàm Mpồl kwang bàng kấp dờng đah bàr lơgar tus mờ dơ̆ wă. Dơ̆ tus còp mùl màl lơgar Việt Nam là dơ̆ tus còp sơnrờp ngan tus câu Á bơh Thủ tướng lơgar Séc ồng Petr Fiala dê bơh tŭ geh dờp guh at gơnoar broă tàm lồi nam 2021 mờ là dơ̆ tus còp sơnrờp ngan bơh kwang bàng lam bồ Cíñ phủ lơgar Séc dê tus lơgar Việt Nam tàm 15 nam do. Tàm dơ̆ tus còp lơgar Việt Nam do, tơnơ̆ mờ dơ̆ cri bơyai mờ Thủ tướng Cíñ phủ ồng Phạm Minh Chính, Thủ tướng lơgar Séc ồng Petr Fiala geh cri bơyai mờ Củ tịc lơgar ồng Võ Văn Thưởng; bal mờ Thủ tướng ồng Phạm Minh Chính tus bal pơrjum cri bơyai mpồl lơh sa kă bro Viêt Nam mờ Séc mờ geh ờ uă broă lơh kwơ màng ndai.