Pơrjum geh bơyai lơh tơn tàm hìu lơh broă Cíñ phủ mờ pờ tơlik tàm internet tus rơlao 600 anih pờ tơlik tàm ală xã, sơnah ƀòn, thị trấn, kơnhoàl, thị xã, càr, ƀòn dờng dê. Tàm pơrjum do, Thủ tướng sồr pal sền wơl, lơh loh broă tài bè lơi kung gam geh broă lơh phan tàm dà ờ di mờ adăt boh lam, ờ yal, ờ di mờ kơrnoăt geh ai.

Thủ tướng đơs tờm, he lơh broă do là tài bơta kwơ dà lơgar he dê, tài bơta kwơ bơh làng bol, mờ tài rùp rài bơh dà lơgar dê. Đơs tàm pơrjum, Thủ tướng ồng Phạm Minh Chính đơs tờm, pơrjum do kờñ cri bơyai broă gam geh sùm tàm 5 nam do. Nam lài, Thủ tướng Cíñ phủ neh pơrjum pờ tơlik tàm internet bè broă do, mơya tus tŭ do kung gam ờ hềt bơsong gơs bơta do. Thủ tướng sồr pal jòi geh bơta tờm, bơsong bơta tờm hơ̆ tus gùng tus dà, di pal, mùl màl geh cồng nha; đơs loh, tài bè lơi ală lơgar gùt dar lơh gơtùi.