Tàm pơrjum ală kwang bàng Cíñ phủ neh iăt jơnau yal bè rơndăp broă lơh Adat bơcri priă dà lơgar (tam gơl); Jơnau yal bè rơndăp broă lơh Adat tam gơl, bơtơl bàr pe bơta bơh Adat rơndăp ù tiah, Adat Bơcri priă, Adat tàm pơrlòng giă; Jơnau yal bè rơndăp broă lơh Adat tam gơl, bơtơl bàr pe bơta bơh Adat Kes priă dà lơgar, Adat Atbồ, ngui phan bơna dà lơgar, Adat Ơn prap dà lơgar...

Is ồn bè rơndăp broă lơh Adat bơcri priă dà lơgar (tam gơl) jat Thủ tướng ồng Phạm Minh Chính, ală bơta geh ngan pal geh bơh bơta geh ngan, sền dờng màng bơta geh ngan, ai bơta geh ngan lơh bơta đo was nàng pleh gơlik geh bơta ờ niam, pleh bơta lơh tìs ai ală kwang bàng in, lòt bal mờ hơ̆ là broă rơngòt kong kơnòl, rơngòt lơh tìs mờ ờ gŏ lơh, bơh hơ̆ pơhì pơhà priă jền, tơnguh priă jền lơh jat ai làng bol mờ mpồl lơh sa kă bro in. Thủ tướng tơngkah, ờ gŏ di lơh geh tiah broă dan ai, pal ngăc ngar ngui ală khà priă tàm lơgar mờ lơgar ndai, priă dà lơgar mờ ală tiah, sơlơ tơnguh tai jat sền sền gròi, pleh broă sơmờm broă dong kờl nàng sa kuề, sa kuà mờ bơta ờ niam; jờng rơ mờ lơh glài kràñ song dơ pă mờ di tŭ.