VOV4.K’ho - Drim òr (15/09), Thủ tướng Cíñ phủ ồng Phạm Minh Chính đơng lam pơrjum chồl pràn broă lơh niam wơl sră nggal mờ lơh pa jơh gùng dà đơng lam, lam sồr drơng làng bol, mpồl lơh sa kă bro in.

                Thủ tướng ồng Phạm Minh Chính đơng lam pơrjum chồl pràn broă lơh niam sră nggal

Pơrjum geh tơrbŏ bal mờ internet tus 63 càr, ƀòn dờng tàm gùt lơgar. Đơs tàm pơrjum, Thủ tướng ồng Phạm Minh Chính đơs loh, lơh niam wơl sră nggal sùm geh Đảng, Dà lơgar ai là broă kwơ màng nàng bơ̆t bơtàu, lơh gơs dà lơgar geh gơnoar adăt boh lam xã hội chủ nghĩa kloh niam, pràn kơl dang, lơh pràn, lơh geh cồng nha, tài làng bol drơng broă, tài broă tơnguh bơtàu dà lơgar dê. Thủ tướng đơs tờm, kơnờm mờ broă lơh ngan bơh jơh ală mpồl lơh broă cíñ trị bal mờ gùt làng bol, he geh ală broă lơh gơguh kwơ màng tàm broă lơh niam wơl sră nggal, tàm hơ̆ uă ngan là broă lơh niam sră nggal; lam lơh mờ hòi jà ală bơta pràn tus bal mờ broă tơnguh bơtàu dà lơgar; tơnguh uă bơta pràn, cồng nha tàm broă đơng lam lam sồr bơh gơnoar atbồ ală kấp. Mơya, bơdìh mờ ală cồng nha neh lơh geh, kung gam geh ală bơta ờ pràn pal gờñ tơmù mhar bơsong, hòi jà mờ ngui geh cồng nha ală bơta pràn tơnguh, tơnguh bơtàu dà lơgar tàm bơta tŭ do.

Cau mblàng Ndong Brawl