VOV4.K’ho - Drim òr (05/04), tàm hìu lơh broă Cíñ phủ, Thủ tướng ồng Phạm Minh Chính đơng lam Pơrjum pờ tơlik tàm internet gùt lơgar bè broă lơh sa mpồl bơtiàn nhai 3 mờ 3 nhai nam 2022, lơh jăt broă brồ guh wơl mờ tơnguh bơtàu lơh sa mpồl bơtiàn, broă lơh bal mờ broă chồl mhar broă tam pà, bơcri priă jăt rơndăp broă priă bơcri dà lơgar nam 2022, broă lơh jăt ală broă lơh gùng lòt kwơ màng dà lơgar.

Thủ tướng ồng Phạm Minh Chính đơng lam Pơrjum pờ tơlik tàm internet gùt lơgar bè broă lơh sa mpồl bơtiàn nhai 3 mờ 3 nhai bồ nam 2022

Đơs tàm pơrjum, Thủ tướng ồng Phạm Minh Chính đơs tờm, ngai 05 nhai 1, Cíñ phủ bơyai lơh pơrjum pờ tơlik tàm internet mờ ală càr, ƀòn dờng bè broă tơnguh bơtàu lơh sa mpồl bơtiàn nam 2022, tus tŭ do, tờm 3 nhai tơnơ̆ mờ pơrjum do, pal geh sền wơl broă lơh jăt broă lơh nam 2022, broă tus bal geh rơcang lài, tus bal bơh làng bol, mpồl bơtiàn anih lơh sa kă bro tềng đăp mờ broă đơng lam bơh gơnoar atbồ ală kấp. Thủ tướng sồr, ală anih lơh broă tàm Dà lơgar pal geh broă lơh di tŭ, tơmù ờ uă ngan broă gơrềng ờ niam, mờ jơnau kờñ dŭt ndơl là gàr niam broă lơh sa dờng mờ ală broă lơh ndrờm bal dờng, bơ̆t bơtàu broă lơh sa krơi is, lơh tờm. Thủ tướng sồr ală kwang bàng tơrgùm bơta ngăc ngar, sền wơl ală broă lơh mờng chài neh lơh pa do nàng ai geh jơnau bơsram broă mờng chài, mờ ai geh broă lơh bơh tŭ do tus lồi nam nàng lơh jăt ală Nghị quyết bơh Quốk hội, Cíñ phủ, mùl màl jơh jơnau đơs pơn dŭt bơh Pơrjum Dà lơgar 4 nhai 10 nam 2021.

Cau mblàng Ndong Brawl