Đơs tàm pơrjum, Thủ tướng Cíñ phủ ồng Phạm Minh Chính đơs nền, Tây Nguyên là ù tiah kuơmàng ngan bè lơh sa, cíñ trị, lơngăp lơngai, sền gàr dà lơgar mờ tiah ơm kis brê bơnơm bơh dà lơgar dê. Đảng, Dà lơgar, ală kwang Tổng Ƀí thư bơh ală tŭ tơngai sùm lời ai bơta sền gròi dờng ngan, nùs nhơm kuơmàng ngan gơ wèt mờ bơta bơtàu tơnguh mờ kơ̆ kơljap bơh Tây Nguyên dê; neh geh uă jơnau lơh nền tàm pơrjum, jơnau pơn dut, rềp ndo là Jơnau lơh nền tàm pơrjum sồ 23 bơh Ƀộ Cíñ trị dê bè “Gùng dà bơtàu tơnguh lơh sa – mpồl bơtiàn mờ sền gàr dà lơgar, sền gàr lơngăp lơngai tiah Tây Nguyên tus nam 2030, broă rơndap lơh tus nam 2045”. 

Mờ nùs nhơm “Gùt lơgar tài Tây Nguyên; Tây Nguyên sơrlèt gan kal ke brồ guh bal mờ gùt lơgar”, Thủ tướng Cíñ phủ kơp kờñ mờ pin dờn, Đảng ƀộ, gơnoar atbồ, mpồl phàu crong mờ làng bol ală càr Tây Nguyên, tiah rềp bal mờ nùs nhơm, bơta gơn kơnờm pa sơrlèt gan kal ke, bơta lòng, lơh gơlik bơta tam gơl pràn kơldang rlau tàm bơtàu tơnguh lơh sa – mpồl bơtiàn, lơh gơlik bơnàng jă lam lơh gơtùi kơnòl broă sền gàr lơngăp lơngai, rơndap tap sèng tàm tơngai tus.