Drim òr (20/04), Pơrjum yal jơnau bè lơh jăt broă rơndăp ù tiah tơrgùm bal dà lơgar tơngai bơh nam 2021 tus 2030, wèt tus nam 2050, mờ tơngu me “Bồ tơngoh pa – kơlôi sơnơng pa – bơta niam pa – bơta kwơ pa” neh geh bơyai lơh tềng đăp mờ broă đơng lam bơh Thủ tướng ồng Phạm Minh Chính dê.

Pơrjum geh bơyai lơh jăt broă lơh pờ tơlik tàm internet bơh anih tờm tàm Hìu lơh broă Cíñ phủ mờ 63 càr, ƀòn dờng tàm gùt lơgar. Đơs tàm pơrjum, Thủ tướng Cíñ phủ ồng Phạm Minh Chính đơs tờm, rơndăp ù tiah tơrgùm bal dà lơgar là kơnòl cíñ trị kwơ màng mờ geh kwơ jŏ tơngai, lơh tờm, jŏ jòng, mơya kung là broă dờng ơnàng, pa ngan, kal ke ngan, gơlơh mhar ngan mờ ờ hềt tŭ lơi geh”. Do là cơng tàng adăt boh lam, phan lơh broă kwơ màng dong kờl Dà lơgar ai geh gùng dà, broă lơh, ai geh bơta pràn, tiah tơnguh bơtàu, gàr niam broă tơrbŏ ndrờm bal đah rơndăp ù tiah dà lơgar mờ rơndăp ù tiah jăt tiah mờ rơndăp ù tiah càr nàng lơh uă ngan bơta geh, bơta pràn bơh dà lơgar dê nàng tơnguh bơtàu lơh sa mpồl bơtiàn mhar mờ kơl jăp. Thủ tướng sồr ală kấp, ală gah lơh broă tơrgùm đơng lam lơh jăt ndrờm bal, geh cồng nha 10 kơnòl broă lơh, tam pà kơnòl mùl màl nàng ai lài priă lơh geh cồng nha broă lơh do.