Thủ tướng đơs nền, srơh tàm pơrlòng mờ broă lơh pà khà jờng là bơta pràn tàm dơlam bơh dà lơgar dê den tàng pal lam lơh geh tơngume tờm, geh bơta tờm, ngan ngồn, geh cồng nha, ờ di mìng đơs lơm gời. Bơh nam 2021 tus tŭ do, Thủ tướng Cíñ phủ neh lam lơh 4 srơh tàm pơrlòng tàm gùt lơgar, mờ kung pơn jat tai lam lơh 3 srơh tàm pơrlòng. Mpồl duh broă đơs, ală srơh tàm pơrlòng bơh Thủ tướng Cíñ phủ lam lơh geh lơh jat ring bal, geh cồng nha, là broă lơh tờm, ai tơlik lài gùng dà ai ală srơh tàm pơrlòng in.

Đơs pơn dut dơ̆ pơrjum, Thủ tướng Cíñ phủ ồng Phạm Minh Chính jờng rơ mờ đơs niam nùs nhơm geh kơnòl mờ bơta tă pơgồp jơh nùs bơh ală ƀộ, mpồl, gah broă lơh, ală càr, ƀòn dờng, mpồl bal mờ làng bol dê neh lơh jat, lam lơh geh cồng nha ală srơh tàm pơrlòng. Thủ tướng đơs ngan, srơh tàm pơrlòng kờñ gơboh dà lơgar mờ broă lơh tàm pơrlòng, pà khà jờng là bàr tơngume sùm gơ tàm jat bal mờ gơp, là dùl tàm ală bơta pràn tàm dơlam jơi bơtiàn, dà lơgar dê.