VOV4.K’ho - Di tàm dơ̆ tus pơrjum dờng kwơ màng mpồl ASEAN mờ lơgar Mỹ, còp mờ lơh broă tàm lơgar Mỹ mờ Liên hợp quốk, tàm càr lơgar Washington, D.C, lơgar Mỹ; Thủ tướng Cíñ phủ ồng Phạm Minh Chính neh tus còp mờ geh jơnau đơs kwơ màng bè broă lơh tàm Anih kơlôi sơnơng Rơndăp broă lơh mờ Dunia lơgar Mỹ.

Tàm jơnau đơs, Thủ tướng đơs tờm, broă jơh nùs, nùs nhơm pin dờn mờ geh kơnòl geh gơnoar kwơ màng nàng bơsong ală broă geh ai gơwèt mờ dunia tŭ do. Thủ tướng đơs tờm tai, là dùl lơgar tus bal niam, geh kơnòl tàm mpồl ASEAN bal mờ mpồl bơtiàn dunia dê, lơgar Việt Nam sùm lơh ngan pơgồp bal tàm broă cri bơyai mờ lơh broă bal, tŭ lơi kung pơgồp bal gơnoar rơcang lài, niam, di pal mờ bơta geh bal mờ bơngă bơh lơgar Việt Nam dê. Lơgar Việt Nam sùm kơ̆p kờñ tơnguh broă lơh git gơ̆p, lơh broă bal mờ lơgar Mỹ tàm tơngu me jơh nùs, pơn jăt tai tơnguh nùs nhơm pin dờn, tơnguh broă lơh geh kơnòl bơh bàr gah dê, tài bơta kwơ bal bơh làng bol bàr lơgar, tài bơta ring lơngai, lơh broă bal mờ tơnguh bơtàu tàm tiah do mờ tàm dunia.

Cau mblàng Ndong Brawl