VOV4.K’ho- Tàm dơ̆ pơrjum ƀăo ờs mờng bơh Ƀộ Ngoại giao dê geh lơh tàm mho ngai 21/04, cau sơ pơ̆ bơr Ƀộ Ngoại giao Việt Nam mò Lê Thị Thu Hằng pà gĭt, Thủ tướng ồng Phạm Minh Chính geh lam bồ mpồl kwang bàng ala măt lơgar Việt Nam lòt Pơrjum Kwang bàng kâp dờng kwơmàng đah Mỹ mờ ASEAN geh lơh tàm Washington, lơgar Mỹ tàm nhai 05 tus.

Di tàm dơ̆ do, Thủ tướng ồng Phạm Minh Chính geh lòt còp mờ lơh broă tàm lơgar Mỹ mờ Liên hợp quôk. Tơnơ̆ rlau 27 nam lơh bơta gĭt gơ̆p lơh broă bal, bơta gĭt gơ̆p đah Việt Nam mờ Mỹ neh geh ală bơta cơnđòa lòt guh jòng, jăt tàm bơnàng jă geh kwơ bal, sền dờng màng rài lơngăp lơngai is gơnoar tờm ù tiah mờ tơl làm ù tiah dà lơgar mờ kơrnoăt boh lam rài ătbồ cíñ trị bơh gơ̆p dê.

Jăt tàm bơta hơ̆, Việt Nam kơ̆p kờñ mờ rơcăng lơh broă bal mờ gơnoar ătbồ lơgar bơh Kwang ătbồ lơgar Mỹ ồng Joe Biden dê nàng lơh bơta gĭt gơ̆p đah 2 lơgar pơn jăt tai bơtàu tơnguh ngan ngồn tàm uă broă, geh cồng nha mờ kơ̆ kơl jăp jŏ jòng, tài bơta ring lơngai kơ̆ kơl jăp lơh broă bal mờ bơtàu tơnguh bơh kơnhoàl ù tiah do mờ jơh gùt dunia dê.

Cau mblàng Lơ Mu K’Yến