Tàm dơ̆ lam lơh, Thủ tướng Cíñ phủ ồng Phạm Minh Chính đơs sùm, tŭ gam kis, Củ tịc Hồ Chí Minh sùm gĭt, tam pà bal, sền gròi rài kis bơh làng bol mờ cau lơh broă in bal mờ nùs nhơm kờñ gơboh kòn bơnus jrô ơnàng uă ngan. Bơta sền gròi bơh Bác Hồ dê geh ală rơnàng Kwang đơng lam bồ Đảng, Dà lơgar đòm jat, tàm pơn jat tai, neh đơng lam, sồr lơh mờ ai lơh jat, lam lơh uă broă lơh, broă lơh bơtàu tơnguh mpồl cau lơh broă.

Tàm tơngai tus, Thủ tướng sồr sùm iăt, kơno, tam pà bal mờ lơh ngan bơsong ală bơta kal ke, kòl yan, gàr niam gơnoar mờ bơta kwơ di mờ adat boh lam, bơta di pal bơh kông ñân, cau lơh broă dê. Thủ tướng đơs sùm uă kơnòl broă mờ ală ƀộ, ngàñ, ală tiah mờ Tổng Liên đoàn Lao động Việt Nam, tàm hơ̆ geh kơnòl broă gàr niam broă lơh kơ̆ kơljap, bơtàu tơnguh rài kis, lơh niam ală bơta lơh broă bơh kông ñân dê; tơrgùm lam lơh geh cồng nha bơnah priă ai càn dong kờl ờ sa priă cồng uă 120 rơbô tơmàn đong ai bơtàu tơnguh hìu ơm mpồl bơtiàn, hìu ơm kông ñân in. Mờ Thủ tướng kung sồr gờñ geh broă lơh kràñ cê bơtàu tơnguh cồng nha lơh broă dà lơgar, bơtàu tơnguh bơta gĭt wă, bơta jak chài, ngan là bơta chài broă lơh ai cau lơh broă in.