Tàm jơnau đơs pơn dŭt dơ̆ pơrjum, Thủ tướng neh mblàng bè bơta tơl pràn, bơta pràn bơh càr Đồng Tháp dê mờ đơs loh: Đồng Tháp là càr geh uă bơta tơl pràn, bơta pràn; kơ̆p kờñ càr ngai sơlơ ai tơngŏ gơnoar, bơngă kwơ màng, là tiah tờm bơh broă lơh sa suơn sre kơl jăp, lam lài gùt lơgar tàm ờ uă gah lơh sa suơn sre geh bơta kwơ bè phan tàm dà, plai chi, kòi phe.

Thủ tướng sơñio loh, tàm tơngai tus, càr Đồng Tháp pal tơrgùm lơh pràn pe bơta pràn gơguh lơh sa (bơcri priă, ngui sa, tăc phan mờ lơgar bơdìh); lơh niam drà kă bro tàm lơgar mờ lơgar bơdìh; lơh ngan lơh mhar bơsong priă bơcri dà lơgar dê; di tŭ bơsong kal ke, gơkòl, lơh pràn lơh sa, kă bro. Càr pơn jăt tai lơh pràn broă lơh niam sră nggal, lơh niam tiah bơcri priă kă bro; Tơrgùm bơtàu tơnguh măi mŏk lơh gơs phan ngui sa, kông nghệ kao, năng lượng lơh geh wơl. Bơtàu tơnguh lơh sa suơn sre hữu kơ, kơl jăp, ngui kông nghệ kao, lơh gơs ală mpồl phan kă bro tờm, geh bơta niam, dong kờl broă pơgồp lơh sa, ngui sa bơh broă lơh pờ tơlik tàm internet, broă kă bro tàm điện tử. Bơtàu tơnguh lòt nhơl pơgồp bal mờ rài lài do, bơhiàn niam, bơta niam chài, di pal mờ bơta geh is, ală phan geh lơh tờm, krơi is.