VOV4.K’ho - Di tàm broă lơh “Ngai tam gơl sồ gah ngân hàng” geh Ngân hàng Dà lơgar Việt Nam bơyai lơh, ngai òr (04/08), Thủ tướng ồng Phạm Minh Chính neh lơh broă mờ Kwang đơng lam Ngân hàng Dà lơgar bal mờ kwang đơng lam ală ngân hàng kă bro.

Thủ tướng sồr ală ngân hàng lơh ngan tơmù khà priă tă, lơh ngan tơmù khà priă cồng, priă tă ai càn, tam pà bal kal ke, rềs àr, dong kờl mpồl lơh sa kă bro mờ cau càn bal mờ gah lơh sa tàm bơta gơtìp kal ke, tơlòng tŭ do. Ală ngân hàng pal rơcang, tus bal niam rơlao tai tàm broă tus bal ală broă lơh, broă rơndăp lơh tơnguh bơtàu lơh sa mpồl bơtiàn bơh Đảng mờ Dà lơgar, tàm hơ̆ uă ngan là broă ai càn tơnguh bơtàu hìu ơm ai kông ñân, cau geh priă ờ uă in. Thủ tướng jào Ngân hàng Dà lơgar bơ̆t bơtàu kơ cế, broă lơh nàng ală ngân hàng lơh is, tus bal is, lơh jăt tàm nùs nhơm tơnguh nùs nhơm niam kă bro, geh kơnòl mpồl bơtiàn mờ nùs nhơm niam mờ ƀòn lơgar, dà lơgar, làng bol.

Cau mblàng Ndong Brawl