Đơs pơndŭt dơ̆ lơh broă, Thủ tướng sồr, tàm tơngai tus, càr Hoà Bình lơh jat geh cồng nha rơndăp ù tiah neh geh ring bal, ngui uă ngan rlau jơh bơta ƀuơn bơta pràn krơi is, tŭ tơngai niam, bơta ƀuơn tàm pơrlòng, lơh geh ngan ngồn gùng dà broă lơh, rơndăp broă, jơnau kờñ bơtàu tơnguh; lơh geh ù tiah bơtàu tơnguh pa, lơh geh bơta kwơ pa.

Bè ală kơnòl broă, broă lơh tờm Thủ tướng sồr, càr Hoà Bình pal sùm tam gơl pa nùs nhơm bồ tơngoh, rơndăp broă bơtàu tơnguh, ngui jơh ală bơta pràn tàm dơlam, kwơ màng là đòm jat niam bơhiàn kah yau, niam chài; lơh geh ală tiah gơn kơnờm lơh tiah tờm bơtàu tơnguh. Bơtàu tơnguh ală gah lơh broă gơn kơnờm nàng sơlơ tơnguh gơguh lơh sa, tơrgùm tàm lơh sa mờ măi mok lơh gơlik phan, mòn phan, ngui măi mok pa; lòt nhơl ƀòn brê bơnơm, ơm rlô să, tàp pràn să jan, bơhiàn niam chài niam bơnĕ...; lơh sa suơn sre sàng gọh, hữu kơ, geh bơta niam uă. Sơlơ tơnguh mờ tơnguh uă cồng lơh bal lơh sa, ngui niam gơnoar broă tàm tơrbŏ bal kơnhoàl ù tiah đah tô Dà lơgar mờ càr lơgar Hà Nội, tiah ring dà dờng Hồng.