VOV4.K’ho- Ngai 16/03, Thủ tướng Cíñ phủ ồng Phạm Minh Chính lơh broă mờ Tập đoàn Nhơm zờu dà lơgar Việt Nam (PVN) bè broă lơh broă nam 2021, 2 nhai bồ nam 2022 mờ broă rơndăp lơh nam 2022. Đơs pơndŭt dơ̆ pơrjum, Thủ tướng ồng Phạm Minh Chính đơs nền, Cíñ phủ, Thủ tướng Cíñ phủ bơh ală tŭ tơngai ndrờm sền gròi ngan tus PVN nàng tập đoàn bơtàu tơnguh kơ̆ kơl jăp, niam bơnĕ mờ ngai sơlơ geh cồng nha.

Thủ tướng sền bal dùl nùs bal mờ ală jơnau dan, jơnau đơs bơh PVN dê tàm dơ̆ lơh broă. Tàm hơ̆, geh ală broă neh mờ gam pơn jăt tai geh bơsong. Mờ ală broă neh geh kâp geh gơnăp gơnoar ai gùng dà bơsong, den PVN pal pơgồp bal niam mờ ală ƀộ, gah lơh broă mờ anih lơh broă bơsong jơh jăt tŭ tơngai loh làng. Thủ tướng sồr kwang đơng lam bồ PVN pơndờm pơnđiang mpồl kwang bàng, kông ñân viên cứk, cau lơh broă pơn jăt tai tam klăc bal, ring bal, lơh ngan, pơđơl pràn sơrlèt gan kal ke, bơta lòng, bal mờ Đảng, Dà lơgar mờ làng bol bơsong broă kwơmàng ngan là sền gàr ai ring bal năng lượng jơh bal tềng đăp măt mờ jŏ jòng, pơgồp bơnah bơ̆t bơtàu rài lơh sa lơngăp lơngai is, lơh tờm is.

  Cau mblàng Lơ Mu K’Yến