VOV4.K’ho - Tàm dơ̆ tus lơh broă tàm ƀòn dờng Cần Thơ, Thủ tướng ồng Phạm Minh Chính mờ mpồl kwang bàng lơh broă bơh Cíñ phủ neh tus còp mờ lơh broă mờ mpồl kwang đơng lam Tổng Kông ty pờ tơlik ồs đèng 2, tập đoàn Điện lực Việt Nam.

Tơnơ̆ mờ tŭ iăt jơnau yal bè broă lơh sa kă bro, broă lơh jăt ală rơndăp broă lơh ồs đèng, Thủ tướng ồng Phạm Minh Chính sồr Tổng Kông ty pal kơlôi sơnơng gùng dà broă lơh ngui tơn anih lơh broă phan bơna tŭ do geh mờ bơcri priă blơi kông nghệ pa nàng wèt tus ờ pal lơh broă mờ chah. Tàm tơnơ̆ do, pal kơlôi sơnơng lơh ală ồs đèng càl, ồs đèng măt tơngai. Bè ală rơndăp broă lơh gơwèt Tiah tờm Điện lực Ô Môn, Thủ tướng sồr Ƀộ Kông thương, Tập đoàn Điện lực Việt Nam (EVN), Tập đoàn Nhơm jờu Việt Nam (PVN) pơgồp bal kơlôi sơnơng lơh geh khà nhơm kờñ lơh geh uă ngan nàng lơh ală Hìu măi Ô Môn I, II, III, IV.

Cau mblàng Ndong Brawl