Đơs tàm dơ̆ pơrjum, Thủ tướng jờng rơ uă ngan, jờng rơ ală cồng nha kwơ màng lơh geh bơh gah bơto bơtê dê tàm nam bơsram 2022-2023, tơngŏ bơta jơh nùs jơh tồr, geh kơnòl, lơh ngan jơh nùs, pơnđơl pràn lơh ngan bơh jơh gùt gah dê. Bè broă rơndăp lơh, kơnòl broă tờm nam bơsram pa, Thủ tướng sồr ală Ƀộ, ngàñ, anih lơh broă, ală tiah pơn jăt tai kờp sền, tam gơl, bơtơl di tŭ kơrnoăt, gùng dà broă lơh, broă lơh dong kờl, lơh sir ală adat boh lam ƀuơn ƀoài nàng lơh jăt tam gơl pa bơto bơtê, tơnguh uă broă gơtùi lơh, geh cồng nha atbồ dà lơgar dê bè bơto bơtê.

Ngan là Thủ tướng sồr, bơyai lơh niam broă tơn jơh 10 nam lơh jăt Nghị quyết sồ 29 bơh Dà lơgar dê bè tam gơl pa kwơ màng, tơl làm gah bơto bơtê; pơn jat tai kơlôi sơnơng lơh sir, lơh uă broă lơh bơto bơtê pe kấp nam 2018 di pal mờ jơnau kờñ, jơnau sồr geh ai; bơt bơtàu, lơh niam wơl, bơtơl ală broă lơh, broă lơh dong kờl gơwèt mờ mpồl cau pơgru ai gơ in di pal; sơlơ tơnguh yal tơngĭt jơnau mblàng yal bè gùng dà broă lơh, broă lơh tam gơl pa bơto bơtê, lơh geh bơta dùl nùs bal bơh tơl rơnàng làng bol dê.