VOV4.K’ho- Mho ngai òr 15/07, Thủ tướng Cíñ phủ ồng Phạm Minh Chính neh lòt chu ñàng tàm Hìu duh kah Ƀác Hồ mờ chu ñàng kah kơlôi ală Cau ling khin cha jak chài chơ̆t màng xã Hiệp Hưng, kơnhoàl Phụng Hiệp, càr Hậu Giang.

Thủ tướng lòt sền Tiah sền gàr brê bơnơm geh is Tiah sền gàr Lung Ngọc Hoàng

Pơn jăt hơ̆, Thủ tướng mờ mpồl lơh broă neh lòt sền ù tiah ngan ngồn tàm Tiah sền gàr brê bơnơm geh is ù ngơr dà Lung Ngọc Hoàng tàm kơnhoàl Phụng Hiệp. Tiah Sền gàr Lung Ngọc Hoàng là tiah sền gàr uă phan kis gơwèt tiah mìng dùl lơm ngan tàm jơh gùt lơgar tŭ do, geh pơnrơ là “nha klờm soh tơlir” bơh tiah ring dà dờng Cửu Long dê.

Tơnơ̆ tŭ iăt jơnau yal mờ lòt sền ù tiah ngan ngồn, Thủ tướng sồr càr jòi cau bơcri priă geh bơta pràn mờ bơta mờng chài nàng ngui niam ală jơnau kwơ brê bơnơm geh is bơh tiah sền gàr brê bơnơm geh is do dê nàng bơtàu tơnguh nhơl chờ ƀòn brê bơnơm tàm ală kơnhoàl ù tiah jăt jơnau ai bơh kơrnoăt boh lam dê. Gơnoar ătbồ ală kâp hòi jà làng bol tus lơh bal niam broă lơh sền gàr ală phan kis, sền gàr ală jơi phan kis mờ chi che kwơmàng ờ huan ngan geh do.

Cau mblàng Lơ Mu K’Yến