Đơs tàm Pơrjum, Thủ tướng ồng Phạm Minh Chính sồr Asean mờ lơgar Ấn Độ pơn jăt tai bơ̆t bơtàu bơta geh bal bè niam chài, mpồl bơtiàn, kòn bơnus, bơtàu tơngguh gĭt gơ̆p bàr gah ngai sơlơ pràn kơldang kơ̆ kơl jăp, tơl làm. Thủ tướng đơs nền, tàm bơta geh bal pràn kơldang kơ̆ jăp, tam klăc bal jŏ rài, Asean kơ̆p kờñ bal mờ lơgar Ấn Độ, lơgar rềp bal rềp mềl, cau bơyô song dơ pă mờ cau lơh broă bal pin dờn tơl làm, tă pơgồp uă ngan ai ring lơngai, kơ̆ kơl jăp, lơh broă bal bơtàu tơngguh pas sơm, kơ̆ kơl jăp bơh tơl gah dê, tàm kơnhoàl ù tiah do mờ tàm dunia.

Đơs wih đơs wơl gĭt gơ̆p Cau lơh broă bal Jŏ jòng Tơl làm đah Asean mờ Ấn Độ, Thủ tướng sồr 2 gah sơlơ tìp măt tơm bơh bơr, lơh broă bal mờ lơh geh bơta pin dờn, bơsong tam pìt tam phà bơh ală broă lơh ring lơngai, drơng mờ ală bơta lòng bal, sền dờng màng adăt boh lam ală lơgar. Thủ tướng ồng Phạm Minh Chính kờñ ală jơnau kơlôi lơh bơh lơgar Ấn Độ dê bè Jơnau kơlôi lơh Mpồl tam klăc bal năng lượng măt tơngai, Mpồl tam klăc bal xăng zờu siñ họk, Mpồl tam klăc bal phan bơna kong jai mờ trồ tiah lơh aniai, kung bè sồr lơgar Ấn Độ dong kờl bơtàu tơngguh phan bơna sơnơm tơm ba.