Kwang đơng lam ală mpồl lơh sa kă bro tơlik nùs nhơm pin dờn tàm bơta git gơ̆p Lơh broă bal jŏ jòng đah lơgar Việt Nam mờ lơgar Indonesia bơtàu tơnguh niam bơnĕ, geh lơh tơngu me tờm kơ̆ kơl jăp nàng mpồl lơh sa kă bro đah bàr lơgar rề ơnàng ală broă lơh broă bal bơcri priă; đơs niam lơgar Việt Nam là drà kă bro geh bơta pràn ngan, niam ngan ai ală mpồl lơh sa kă bro bơcri priă lơh sa kă bro mờ tăc phan, ală bơta phan geh bơta niam uă.

Tàm dơ̆ tìp măt, Thủ tướng ồng Phạm Minh Chính chờ gờm ală broă bơcri priă geh cồng nha bơh ală mpồl lơh sa kă bro tàm lơgar Việt Nam. Thủ tướng hòi jà, gơwèt mờ broă tơnjŏ tơngai dờp bơcri priă, rề ơnàng broă bơcri priă..., ală mpồl lơh sa kă bro pal pơgồp bal nền nòn mờ ală càr, ƀòn dờng, ală anih lơh broă gơrềng bal bè Ƀộ Kế hoạc mờ Đầu tư nàng geh jơnau bơto sồr, dong kờl mùl màl mờ lơh ală broă pơlam, ai lài di jăt mờ kơrnoăt tàm adăt boh lam dê, tàm nùs nhơm ring bal đah ală mpồl lơh sa kă bro mờ lơh niam sră nggal, pleh mờ bơta lơh uă ir tus mờ cau bơcri priă.