Đơs tàm dơ̆ tìp mat, Thủ tướng ồng Phạm Minh Chính tơngŏ bơta hờn chờ, ngoh rơngăc geh tìp ală cau bơyô rềp mềr mờ đềt mềr ngan bơh làng bol Việt Nam dê, ală cau neh tàm pơrdờn, dong kờl mờ sùm tă pơgồp dà kơl hề ai bơta gĭt gơ̆p 2 lơgar Việt Nam mờ Hàn Quốc tàm rlau 30 nam do.

Ala mat Cíñ phủ, Thủ tướng jơh nùs ưn ngài ală mpồl cau, cau dồ nă să, ală cau bơyô lơgar Hàn Quốc tài bơta kờñ gơboh, bơta dong kờl bal mờ ală bơta pơn đơl pràn lơh ngan lời ai lơgar Việt Nam in; mơkung đơs wih đơs wơl nùs nhơm, bơta sền dờng màng bơh làng bol Việt Nam, mpồl kwang bàng lơgar Việt Nam mờ Dà lơgar, làng bol lơgar Hàn Quốc dê. Thủ tướng đơs nền Đảng, Dà lơgar Việt Nam sền dờng màng uă ngan bơta gĭt gơ̆p mờ Hàn Quốc. Jat tàm ală bơta lơh jat mìng dùl gùng dà broă lơh cribơyai broă mờ lơgar ndai lơngăp lơngai is, lơh tờm is, ring lơngai, lơh bơyô bal, lơh broă bal mờ bơtàu tơnguh, gĭt gơ̆p mờ lơh bơyô mờ uă lơgar, Việt Nam sền dờng màng bơta gĭt gơ̆p mờ lơgar Hàn Quốc mờ kơ̆p kờñ ai bơta lơh broă bal 2 lơgar pơn jat tai geh bơta tam gơl geh ngan, geh cồng nha mờ jŏ jòng ndrờm pal mờ bơta gĭt gơ̆p lơh broă bal jŏ jòng tơl làm.