Đơs pơndŭt pơrjum, Thủ tướng ồng Phạm Minh Chính đơs wih đơs wơl bơta gĭt gơ̆p 2 lơgar ờ hềt tŭ lơi niam bơnĕ bè tŭ do tàm jơh ală gah, gam bơtàu tơnguh duh hồl ngan mờ mut lơh broă ngan ngồn. Uă tŭ tơngai niam lơh broă bal lơh sa đah 2 gah pơn jat tai geh pờ tơlik.

Jờng rơ uă ngan ală jơnau đơs tàm pơrjum, Thủ tướng pà gĭt, sùm kơ̆p kờñ iăt, sền dờng màng ală jơnau tă pơgồp jơh nùs, song dơ pă mờ cribơyai tơn bè ală jơnau đơs, jơnau dan, jơnau bơceh lơh lơh broă bal geh ngan bơh ală Tập đoàn, mpồl lơh sa kă bro lơgar Hàn Quốc dê, tàm hơ̆ geh uă Tập đoàn, mpồl lơh sa kă bro neh bơcri priă tàm lơgar Việt Nam. Thủ tướng jờng rơ, ưn ngài mờ kơ̆p kờñ ală Tập đoàn lam lài lơgar Hàn Quốc pơn jat tai pờ ơnàng bơcri priă, lơh broă bal mờ Việt Nam, bal mờ gơ̆p sơlơ tơnguh tai “ală tiah lơh broă bal pa”, jat tàm ală bơta tus bal cèng bơta “gùt plai ù, tơl làm, tơl nă làng bol” wèt tus jơnau kờñ priă lơh geh kă bro đah 2 gah 100 tơmàn dolar Mỹ tàm nam 2025 mờ 150 tơmàn do lar Mỹ tàm nam 2030.