VOV4.K’ho- Mho ngai 21/06, tàm Hìu duh broă Cíñ phủ dê, Thủ tướng Cíñ phủ ồng Phạm Minh Chính neh tìp măt cribơyai mờ Củ tịc Quôk hội lơgar Mozambique mò Esperanca Bias gam lơh jăt dơ̆ lòt còp ngan ngồn lơgar Việt Nam. Thủ tướng Phạm Minh Chính gờm chờ lơgar Mozambique dơ̆ sơnrờp geh pồ lơh Ủy viên ờ duh broă sùm Hội đồng Ƀảo an Liên hợp quôk tơngai lơh broă bơh nam 2023- 2024 mờ sră pồ uă ngan mờ pin dờn lơgar Mozambique geh lơh gơs niam kơnòl broă kơn jơ̆ kơn jŭt ngan do, tă pơgồp uă ngan tàm bơta ring lơngai, lơngăp lơngai, lơh broă bal mờ bơtàu tơnguh kơnhoàl ù tiah do mờ dunia.

Thủ tướng đơs nền bơta pràn lơh broă bal đah Việt Nam mờ Mozambique gam uă ngan, Việt Nam tŭ lơi kung kờñ tam pà bal bơta mờng chài bơtàu tơnguh mờ lơh broă mờ lơgar ndai, mŭt gơrờm bal mờ lơgar Mozambique; sồr geh ală broă lơh nàng kờñ lơh jrô ơnàng rlau tai bơta gĭt gơ̆p 2 gah mờ kơ̆p kờñ Quôk hội 2 lơgar pơn jăt tai dùl nùs bal, ai tơl bơta ai ală tŭ lam lơh jăt in. Củ tịc Quôk hội lơgar Mozambique đơs nền, lơgar do sền Việt Nam là dùl tàm ală lơgar lơh broă bal kwơmàng ngan rlau jơh tàm câu Á; hơ lơh niam gơnoar broă anih lơh broă lơh adat boh lam dùl nùs bal mờ ai tơl bơta ai broă tơnguh lơh broă bal đah 2 lơgar in.

Cau mblàng Lơ Mu K’Yến