Đơs tàm dơ̆ wă rò, Thủ tướng ồng Phạm Minh Chính tơlik nùs nhơm pin dờn dơ̆ lòt còp rơ̆p lơh geh cồng nha niam bơnĕ, lơh gơlik bơta pràn pa tơnguh bơta gĭt gơ̆p lơh bơyô bal ờs mờng bơh yau mờ lơh broă bal uă bơta đah Việt Nam mờ Phần Lan.

Thủ tướng yal mờ Củ tịc Quôk hội lơgar Phần Lan in bè gùng dà lơh broă mờ lơgar ndai kung bè ală gùng dà, broă lơh mờ cồng nha bơtàu tơnguh lơh sa- mpồl bơtiàn bơh Việt Nam dê; sồr Quôk hội lơgar Phần Lan kờñ broă Ủy ƀan câu Âu (EC) gờñ sơrbì tĕ “sră kơryan” (IUU) gơ wèt mờ phan ròng tàm dà lơgar Việt Nam dê; hòi jà Quôk hội ală lơgar tàm mpồl EU gờñ kĭ Hiệp địñ Sền gàr dong kờl bơcri priă Việt Nam mờ Mpồl Tam klăc câu Âu (EVIPA) mờ pin dờn EVIPA rơ̆p dong mpồl lơh sa kă bro tơl lơgar dê tus geh mờ drà kă bro bơh gơ̆p dê mờ tàm kơnhoàl ù tiah do dê. Thủ tướng ồng Phạm Minh Chính kung sồr 2 gah kơlôi sơnơng ală bơta pràn lơh broă bal bơto bơtê pa bè bơto broă lơh, tam pà bal mờng chài bơ̆t bơtàu ală anih bơto bơtê cồng nha uă, ai tơl bơta ƀươn ai làng bol lơgar Việt Nam in ơm kis, lơh sa mờ bơsram sră kơ̆ kơl jăp jŏ jòng tàm lơgar Phần Lan, pơgồp bơnah lơh niam gơnoar broă mpồl cau lơh kòn gùng lơh bơyô bal mờ lơh broă bal đah 2 lơgar.