VOV4.K’ho- Tơnơ̆ dơ̆ bơyai lơh tơngkah kir sơnrai 45 nam Gùng lòt wèt tus lơh gơ lừ rài bol Pol Pot gơ sơt rung bơh Thủ tướng ồng Hun Sen dê, Thủ tướng ồng Phạm Minh Chính neh geh dơ̆ tìp mat mờ cribơyai broă mờ ồng Hun Sen tàm Hìu lơh broă git gơp lơh bơyô Campuchia- Việt Nam gơ wèt kơnhoàl Memot, càr Tbong Khmum, lơgar Campuchia dê.

Thủ tướng ồng Hun Sen jơh nùs nting bơr gờm chờ mờ ưn ngài Thủ tướng ồng Phạm Minh Chính neh dờp jơnau jà tus bal dơ̆ bơyai lơh tơngkah broă kah yau ngai 20/6/2022, sền do là cơng tàng niam ngan ai git gơp lơh bơyô ờs mờng rềp mềr đah 2 jơi bơtiàn Việt Nam mờ Campuchia. 2 Thủ tướng ring bal pơgồp bal sơlơ tàm pơ gơl mpồl kwang bàng kâp dờng mờ lam lơh niam ală broă lơh tàm tơngume “Nam git gơp lơh bơyô Việt Nam – Campuchia 2022”, tàm hơ̆ geh dơ̆ tơngkah kir sơnrai 55 nam Ngai lơh git gơp lơh broă bal 2 lơgar ngai 24/6/2022 tàm càr lơgar Hà Nội. 2 gah kung ring bal sơlơ tơnguh bơta tàm tơrbŏ bal 2 rài lơh sa, mhar lơh gơs “Rơndap ù tiah tơrgùm jơh ală bơta tàm tơrbŏ bal 2 rài lơh sa Việt Nam mờ Campuchia tus nam 2030”.

Cau mblàng K’Duẩn