Cau tĕ khà kơ̆p kờñ mờ dan Quốk hội, Cíñ phủ pơn jăt tai geh ală broă lơh nàng ngui niam ală gah broă niam, bơsong ală broă kal ke, gơkòl tŭ do bè tàm broă kă bro sơnơm, phan lơh sơnơm, bơcri priă ai broă lơh sơnơm tàm ƀòn lơgar in.

Thủ tướng ồng Phạm Minh Chính neh yal mờ cau tĕ khà ờ uă jơnau tờm bè cồng nha lơh sa mpồl bơtiàn 10 nhai nam 2022, bơta tàm lơgar mờ dunia tŭ do, mờ pà git ờ uă kơnòl, broă lơh tờm ală nhai lồi nam 2022. Jăt mờ hơ̆, Thủ tướng sồr ală kấp, ală gah lơh broă, ală kơnhoàl bañ sền ờ sơ̆p tàm broă đơng lam, lam sồr, sùm rơcang lài, ndrờm bal, bơceh lơh, ngui niam ală bơta niam nàng brồ guh mhar, tơnguh bơtàu kơl jăp. Ai lài bơta kơl jăp lơh sa dờng, sền gròi khà priă gơmù, gàr niam ală bơta ndrờm bal bơh lơh sa-sền do là dùl kơnòl tờm, jal mhar tŭ do.