VOV4.K’ho- Di tơngkah kir sơnrai 92 nam Ngai crơng gơs Đảng Kộng sản Việt Nam, gờm chờ Đảng, gờm chờ sơnam pa, gờm chờ dà lơgar mờ wă rò nam pa Ñâm Zần 2022, mang ngai 21/01, Mpồl rơndap broă dà lơgar bơyai lơh yal mờ jàu khà jờng sră ƀău gùt lơgar bè bơt bơtàu Đảng geh sơnđan Mut mơ̆ biàng dơ̆ 6. Thủ tướng Phạm Minh Chính neh tus bal mờ jàu khà jờng.

Đơs tàm dơ̆ bơyai lơh, Thường trựk Ƀan Ƀí thư ồng Võ Văn Thưởng cih dờp, đơs niam bơta tă pơgồp dờng màng bơh sră ƀău gùt lơgar dê gơ wèt tus mờ broă lơh bơt bơtàu, lơh niam wơl Đảng tàm tơngai lài, jờng rơ bơta lơh ngan bơh Mpồl đơng lam, Mpồl bơyai lơh khà jờng mut mơ̆ biàng dơ̆ 6 mờ nting bơr gờm chờ tus ală cau geh khà jờng. Thường trựk Ƀan Ƀí thư ồng Võ Văn Thưởng đơs loh, ală jơnau sră ƀău bè bơt bơtàu Đảng neh pơgồp bơnah dong gal ngan làng bol tàm lơgar mờ lơgar ndai, gơp bơyô dunia git loh rlau tai bè Đảng he mờ broă lơh bơt bơtàu, lơh niam wơl Đảng bè ală cồng nha mờ dà lơgar neh lơh geh tềng đap bơta đơng lam bồ bơh Đảng dê.

Cau mblàng K’Duẩn