Drim òr (15/09), Thủ tướng Cíñ phủ ồng Phạm Minh Chính lam bồ mpồl kwang bàng ala măt kấp dờng lơgar Việt Nam lòt gùng tus bal Drà ràng tơlik phan kă bro đah lơgar Lo mờ mpồl ASEAN (CAEXPO) mờ Pơrjum kấp dờng Kă bro-Bơcri priă đah lơgar Lo mờ mpồl ASEAN (CABIS) dơ̆ 20 tàm ƀòn dờng Nam Ninh, càr Quảng Tây, lơgar Lo bơh ngai 16 tus ngai 17 nhai 09 nam 2023 jăt jơnau jà bơh Cíñ phủ lơgar Lo dê.

Do là broă lơh kwơ màng geh bal tàm broă tơnkah 20 nam crơng gơs bơta git gơ̆p tam klăc lơh broă bal jŏ jòng đah lơgar Lo mờ mpồl ASEAN dê, tơnkah 20 nam Drà ràng tơlik phan kă bro đah lơgar Lo mờ mpồl ASEAN mờ Kă bro-Bơcri priă đah lơgar Lo mờ mpồl ASEAN. Drà ràng tơlik phan kă bro geh 04 broă lơh tờm mờ 01 pơrjum cri bơyai ntê. Kung ndrờm mờ ală Drà ràng tơlik phan kă bro lài do sơl, nam do, mpồl lơh sa kă bro đah lơgar Việt Nam tus bal Drà ràng tơlik phan kă bro dờng ngan mpồl ASEAN dê mờ 250 hìu tăc, bă ù ơnàng 5 sào.