Tàm pơrjum, Thủ tướng đơs ngan, gah anih cah rơña pal sền gròi uă, pơn jat tai sơlơ tơnguh tai lam lơh tam gơl sồ - sền do là dùl tàm ală broă lơh kuơmàng ngan rlau jơh, dong kờl pràn ngan rlau jơh, geh cồng nha ngan rlau jơh tàm jơh ală gah broă lơh bơh gah Anih cah rơña làng bol dê, tàm hơ̆ sồr gah anih cah rơña pơn jat tai ngui pràn nùs nhơm “5 lơh pràn”. 

Bè kơnòl broă, broă lơh tờm tàm tơngai tus, Thủ tướng sồr, gah Anih cah rơña pal tơrgùm lơh sir gùng dà, broă lơh nàng sơlơ tơnguh tai tam gơl sồ tàm gah Anih cah rơña làng bol, bơtàu tơnguh Anih cah rơña điện tử. Gờñ yal Quôk hội in ring bal Adat rơndap lơh Anih cah rơña làng bol (tam gơl) mờ Adat Yal yă broă làng bol (tam gơl), lơh gơlik bơnàng jă ai ală broă lơh yal yă tàm internet in, cih bè cơng tàng điện tử; bơnàng jă khoa họk mờ bơta dipal adat boh lam bơh lơh gơlik wơl cơng tàng điện tử, gơnoar, kơnòl broă, gơnăp gơnoar bơh ală cau tờm lam lơh yal yă điện tử dê.