Đơs tàm dơ̆ tơngkah kir sơnrai, ala mat Kwang đơng lam bồ Dà lơgar, Thủ tướng ồng Phạm Minh Chính jơh nùs jờng rơ ală cồng nha lơh geh, cồng nha lơh geh tàm dơ̆ lơh broă jak chài ngan bơh ală rơnàng kwang bàng, cau ling mpồl Kảñ sát ntrờn làm bă tiah dê tàm 50 nam do.

Thủ tướng sồr mpồl kwang bàng làng bol đơs bal, mpồl kảñ sát ntrờn làm bă tiah đơs is tàm khat dùl bơta lơi ndrờm pal bơsram lơh jat jrô ơnàng làm uă, gàr niam bơta đơng lam jơh nùs ngan, đơng lam tơn bè tơl gah bơh Đảng mờ lam bồ là Tổng Ƀí thư ồng Nguyễn Phú Trọng, bơta đơng lam bơh Củ tịc lơgar, bơta ring bal atbồ Dà lơgar mờ Cíñ phủ, Thủ tướng Cíñ phủ; bơta đơng lam, atbồ tơn bơh Ƀộ trưởng Ƀộ Kwang àng. Pal ngan ngồn sền broă lơh bơt bơtàu Đảng; tơnguh uă bơta pràn jak đơng lam, bơta pràn tam lơh bơh mpồl đảng, đảng viên; jơh nùs lơh ngan bơt bơtàu mpồl Kảñ sát ntrờn làm bă tiah ngan ngồn sàng goh, pràn kơl dang, kơ̆ kơl jăp, cíñ quy, ñhăp ñhar, bơtàu tơnguh song lòt tus mờ bơta pa.