VOV4.K’ho - Drim òr (08/03), Mpồl kă bro mờ lơh sa mờ măi mŏk Việt Nam, Mpồl tam klăc kă bro lơgar Mỹ tàm Hà Nội bal mờ Phòng Kă bro lơgar Mỹ tàm càr lơgar Washington bơyai lơh Pơrjum dờng Kă bro đah lơgar Việt Nam mờ lơgar Mỹ nam 2022 tàm Hà Nội mờ broă lơh pơrjum tơn pơgồp bal mờ pờ tơlik tàm internet.

          Thủ tướng ồng Phạm Minh Chính tus pơrjum dờng kă bro lơgar Việt Nam mờ lơgar Mỹ nam 2022

Thủ tướng Cíñ phủ ồng Phạm Minh Chính tus mờ geh jơnau đơng lam tàm Pơrjum. Đơs tàm pơrjum, Thủ tướng Cíñ phủ ồng Phạm Minh Chính đơs tờm, broă lơh geh sùm bơh lơgar Việt Nam dê sùm sền lơgar Mỹ là dùl tàm ală lơgar geh broă lơh bal kwơ màng lài ngan. Thủ tướng đơs tờm, Cíñ phủ lơgar Việt Nam hơ geh ai tơl bơta ƀuơn nàng ală mpồl lơh sa kă bro lơgar Mỹ bơcri priă, kă bro geh cồng nha tàm lơgar Việt Nam, tàm hơ̆ uă ngan là tàm ală gah mờ lơgar Mỹ geh bơta pràn mờ lơgar Việt Nam gam kơ̆p kờñ tơnguh bơtàu bè: Năng lượng lơh geh wơl, năng lượng kloh mờ kơl jăp, broă bơ̆t bơtàu broă lơh, priă jền ngân hàng, bơto bơtê mờ bơsram, nhơl chờ, kông nghệ kao, lơh sa suơn sre kông nghệ kao.

Cau mblàng Ndong Brawl