VOV4.K’ho - Drim òr (10/03), tàm hìu pơrjum Dà lơgar, càr lơgar Hà Nội, pơrjum dờng kwang bàng ala măt cau ùr gùt lơgar dơ̆ 13 tơngai lơh broă bơh nam 2022 tus 2027 neh mùl màl sơn đờm mờ 959 nă kwang bàng mùl màl, ala măt ală cau ùr tàm gùt lơgar.

Thủ tướng ồng Phạm Minh Chính geh jơnau đơng lam pơrjum dờng kwang bàng ala măt cau ùr gùt lơgar khoă 13

Kwang geh jơng tàm Ƀộ Cíñ trị, Thủ tướng Cíñ phủ ồng Phạm Minh Chính tus pơrjum sơn đờm. Đơs tàm Pơrjum dờng, Thủ tướng Cíñ phủ ồng Phạm Minh Chính đơs tờm, tàm jơh rơnàng sền gàr mờ bơ̆t bơtàu dà lơgar, bŭ lah tàm tơngai lơi, rài kis bè lơi, mờ nùs nhơm kơ̆ dơn, bồ tơngoh ngăc ngar, bơta pràn, nùs nhơm niam, phi să mờ broă lơh ngan brồ guh, cau ùr Việt Nam neh sơrlèt mờ ală bơta kal ke, bơta kòl yan, nùs nhơm ờ niam, glar bòl, geh ală broă pơgồp bal, broă lơh bal dờng màng, pơgồp bal tàm broă bơ̆t bơtàu mờ sền gàr kơl jăp dà lơgar Việt Nam. Nàng lơh geh ală jơnau kờñ tơnguh bơtàu dà lơgar tàm tơngai tus, Thủ tướng sồr, pal tơnguh bơta pràn tam klăc dờng gùt jơi bơtiàn kòn cau, tàm hơ̆ geh gơnoar kwơ màng bơh cau ùr. Thủ tướng ring bal mờ gùng dà kơnòl broă lơh tàm tơngai bơh nam 2022 tus 2027, ală jơnau kờñ, ală broă lơh pràn mờ kơnòl tờm neh geh ai tàm jơnau yal bơh Pơjum dờng dê.

Cau mblàng Ndong Brawl