VOV4.K’ho - Drim òr (20/01), Thủ tướng Cíñ phủ ồng Phạm Minh Chính tus pơrjum mờ geh jơnau đơng lam tàm pơrjum lơh jăt broă lơh sơnơm nam 2022 geh Ƀộ Y tế bơyai lơh jăt broă lơh pơrjum tơn pơgồp bal mờ pờ tơlik tàm internet mờ rơlao 700 anih pờ tàm 63 càr, ƀòn dờng tàm gùt lơgar.

                      Thủ tướng Cíñ phủ ồng Phạm Minh Chính geh jơnau đơng lam tàm pơrjum

Đơs tàm Pơrjum, Thủ tướng Cíñ phủ ồng Phạm Minh Chính đơs tờm, gah lơh sơnơm tờmu mơ ală kal ke, broă lơh ờ pràn, bơsong ală bơta kal ke tàm broă rơcang sơndră mờ kòp gơtờp bè ai tăc sơnơm, sơnơm vaccine, lơh ală hìu sơnơm ntrờn, hìu sơnơm ing mờ kwơ màng ngan là kơ cế blơi phan, lơh glài nền nòn ală broă lơh tìs, sền kuơ broă rơcang sơndră mờ bơta ờ niam, sa kuề sa koà, geh kwơ mpồl; ờ lời “bơta ờ niam lơh gơrềng jơh gùt lơgar”, bŏt bờtau mpồl kwang bàng, cau lơh sơnơm, cau lơh broă mùl màl kơ̆ nùs, kơ̆ kơl dang bè cíñ trị, ngăc ngar bè broă bơsram, jăk chài bè lơh broă, geh cồng nha tàm broă lơh. Tơnguh broă bơto bơtê kwang bàng lơh sơnơm bè nùs nhơm geh kơnòl mờ nùs nhơm lơh broă.

Cau mblàng Ndong Brawl