Đơs tàm pơrjum, Thủ tướng Cíñ phủ ồng Phạm Minh Chính đơs tờm, bơta ờ niam ma túy neh mờ gam gơs bơta ngòt rơngơ̆t, lơh aniai uă ngan tus mờ kòn bơnus. Hoàc huơr tài bơta ờ niam ma túy lơh gơtìp uă ngan tus ală gah lơh sa, bơta chài rơgơi, mpồl bơtiàn, bơta lơngăp lơngai – sền gàr dà lơgar, lơh aniai tus mờ bơta pràn kơl dang să jan bơh dùl bơnah làng bol, mờ là bơta tờm lơh gơlik geh ală bơta tìs, pơhìn tus mờ bơta ring niam, pas gơs mờ bơta geh sùm bơh tơl lơgar, tơl jơi bơtiàn dê.

Ala măt Cíñ phủ, Thủ tướng neh pơn jờng ală broă lơh ngan, broă pơgồp bal; ưn ngài tềng đăp mờ ală broă lơh ngan, phi să; mờ chờ gờm ală cồng nha jăk chài neh lơh geh bơh kwang bàng, cau ling tàm mpồl Kwang àng làng bol, ală kấp, ală gah lơh broă tàm broă sơndră, tam dră mờ bơta tìs ma túy tàm tơngai do, pơgồp bal kwơ màng tàm cồng nha tơnguh bơtàu mờ sền gàr niam bơta lơngăp lơngai mpồl bơtiàn bơh dà lơgar dê. Nàng ai geh bơta pràn kơl dang tàm broă sơndră, tam dră mờ ma túy, Thủ tướng sồr, broă sơndră, tam dră mờ sền gròi ma tuý sùm pal geh ai bơh tàm broă đơng lam, lam sồr tơn bơh ală kấp ủy Đảng, broă atbồ bơh gơnoar atbồ ală kấp dê, tàm hơ̆, mpồl Kwang àng làng bol là cau lơh tờm.