VOV4.K’ho - Mang òr (30/08), Tỉñ ủy, HĐÑZ, UɃÑZ, UɃMT dà lơgar Việt Nam càr Bình Thuận neh bơyai lơh tơnkah 30 nam ngai crơng gơs wơl càr (1992-2022) nàng sền wơl tơngai tơnguh bơtàu, yal ală bơta geh, cồng nha geh pơnrơ ngan bơh 30 nam crơng gơs wơl càr.

           Thủ tướng ồng Phạm Minh Chính tus pơrjum tơnkah 30 nam crơmng gơs wơl càr Bình Thuận

Tus bal mờ geh jơnau đơs tàm pơrjum, ala măt kwang đơng lam Đảng, Dà lơgar, Thủ tướng ồng Phạm Minh Chính neh chờ gờm, pơn jờng, đơs niam ală broă lơh ngan, cồng nha mờ Đảng ƀộ, gơnoar atbồ, ling klàng bal mờ làng bol càr Bình Thuận neh lơh geh tàm 30 nam bơ̆t bơtàu, tam gơl pa mờ tơnguh bơtàu, pơgồp bal mùl màl tàm cồng nha bal gùt lơgar dê. Tàm tơngai tus Thủ tướng sồr, Đảng ƀộ, gơnoar atbồ, ling klàng bal mờ làng bol càr Bình Thuận pal pơn jăt tai cồng nha neh lơh geh, neh pơn đơl pràn bloh pal lơh ngan pơn đơl pràn rơlao tai, neh tam klăc den sơlơ pal tam klăc rơlao tai, neh lơh ngan sơlơ lơh ngan rơlao tai. Ai bơta pràn bơh să tờm lài ngan, broă lơh di pal, jŏ jòng, lơh ngan; bơta pràn bơh bơdìh là kwơ màng mờ gơguh mhar, pơgồp bal mờ gùt lơgar bơ̆t bơtàu broă lơh sa krơi is, lơh tờm pơgồp bal mờ tơrgùm bal mờ dunia jrô ơnàng, mùl màl, geh cồng nha tàm tơngai pa.

Cau mblàng Ndong Brawl