Mờ kờp jơh priă tă lơh di pơgăp 17 rơbô 400 tơmàn đong, tàm hơ̆ priă tơm ntrờn ù tiah di pơgăp 8 rơbô 280 tơmàn đong, bơnah broă crăp lơh jăt broă lơh BOT mờ khà priă di pơgăp 8 rơbô 880 tơmàn đong. Sền tiah ntrờn ù tiah lơh gùng rơndeh, Thủ tướng ồng Phạm Minh Chính đơs sùm do là gơl gùng tờm ngan, geh kwơ màng jŏ jòng, tơrbŏ đah Tây Nguyên, Tiah đah jum Măt tơngai lik Dà lơgar, ƀlàng rơndeh par Long Thành mờ ală gơl gùng rơndeh ntoăt jờl, anih ơhò dà lềng ơm…

Thủ tướng sồr 02 càr Bình Dương mờ Bình Phước pơgồp bal nền nòn, dong kờl bal nàng lơh mhar broă lơh gùng, tàm hơ̆ geh gơl gùng lòt gan càr Bình Phước mìng geh 07 kơi sồ jăt broă bơcri priă lơh bơh dà lơgar dê den tàng pal mhar lơh, lơh gơs gờñ. Tàm broă lơh, cau tờm dờp lơh ai tơl bơta niam nàng ală mpồl lơh sa kă bro tàm do in lơh nàng drơng tàm broă lơh mhar broă lơh gùng, mờ ai geh broă lơh làng bol in, mờ dong kờl ală mpồl lơh sa kă bro tàm tiah do gơs dờng pràn nàng lơh ală gơl gùng dờng ndai.